《奉旨的愛》
同時係最幸福同最痛苦嘅愛係乜？我諗一定係奉旨。
奉旨，一個係幸福，一個係痛苦，因為幸福往往都係建築係痛苦之上，偏偏極多情侶係沉淪係奉旨之中。
太多太多愛情故事係美滿嘅，但作為一個已婚人夫，我絕對認為愛情係殘忍同痛苦，特別係結婚之後，因為你覺得呢個人已經定左，已經唔會走，所以好多時都會覺得一切來得理所當然，一切都會永遠存在。
曾經係餐廳見過一對情侶食飯，女嘅想食一樣野，但無，男嘅幫佢叫另一樣，然後女嘅發晒脾氣話一定要食，然後男嘅無奈將食物打包，然後去第二度食，期間女仔話，小小野都做唔到，點嫁比你啊。
我即時心諗，咁嘅性格，點娶你啊？
曾經我老婆都係一個奉旨嘅人，基本上我係以小男人存在，直到有一次佢因為我同上述情況相似情況下佢鬧我，我即時好似聽到啪一聲咁，腦入面有樣野碎咗，然後用行動話佢知一個平時好就得人嘅男人發起脾氣時係點佢知之後，佢終於收斂。
我好唔明點解一段感情會有高低，會有強弱勢，兩個人決定一齊，係公平嘅，開心咪一齊，唔開心都唔係唔得，但長期都唔開心咁仲一齊做乜？
奉旨呢個詞用得好好，咩係奉旨，就係皇帝講乜你都要聽，佢再唔合理，你再唔舒服，你都要聽，因為呢個君臣關係之中，你就係要聽，但同時你要知，君臣關係都仲可以好似出糧咁應份要聽，呢段關係除咗金錢之外仲有乜？仲有恐懼。
恐懼係乜，失去你囉。
但去到有一個位，痛苦大過失去你嘅痛時，就係呢個人離開嘅時候，到時你想再彌補都無用，因為過去種種不公平待遇都會盡在眼前，你依家對佢幾好，佢就會思考，點解之前自己會咁慘，明明你係可以咁對自己。
其實同樣嘅事，將奉旨變成感恩，一切都可以繼續，相差嘅就只有語氣同態度，呢樣野，唔駛錢，唔駛努力，一下子，你想做，就會做到。
Search